వాళ్లేదో మనకు ఫ్రీగా ఇస్తున్నట్టు భావిస్తారు... జపనీస్ దుకాణ సిబ్బందిపై భారతీయ యూట్యూబర్ గరంగరం!

జపాన్‌లోని కన్వీనియన్స్ స్టోర్లలో సిబ్బంది భారతీయుల పట్ల చాలా దురుసుగా ప్రవర్తిస్తున్నారని ఓ భారతీయ యూట్యూబర్ చేసిన ఆరోపణ ఇప్పుడు సామాజిక మాధ్యమాల్లో పెద్ద చర్చకు దారితీసింది. సిద్ధార్థ్ భీమానీ అనే ట్రావెల్ యూట్యూబర్ చేసిన ఈ పోస్ట్.. సాంస్కృతిక భేదాలు, పర్యాటకుల ప్రవర్తన, విదేశాల్లో భారతీయుల పట్ల ఉన్న అభిప్రాయాలపై ఆన్‌లైన్‌లో వాదోపవాదాలకు కారణమైంది.

"జపాన్‌లో ముఖ్యంగా భారతీయుల పట్ల సిబ్బంది ఎందుకింత దురుసుగా ఉంటారు? మనం వారి స్టోర్లలో వస్తువులు కొన్నా కూడా, ఉచితంగా ఇస్తున్నట్లు లేదా ఏదో ఉపకారం చేస్తున్నట్లు ప్రవర్తిస్తారు" అంటూ భీమానీ 'ఎక్స్'లో పోస్ట్ చేశారు. ఈ పోస్ట్ క్షణాల్లో వైరల్ అవ్వగా, వేలాదిమంది దీనిపై స్పందించారు.

సాధారణంగా జపాన్‌లోని ఫ్యామిలీమార్ట్, లాసన్ వంటి కన్వీనియన్స్ స్టోర్లు అత్యుత్తమ సర్వీస్‌కు పెట్టింది పేరు. అయితే, అక్కడి సిబ్బంది మర్యాదపూర్వకంగా, నిబంధనలకు కట్టుబడి ఉంటారు. కొందరికి ఇది దురుసుగా అనిపించవచ్చని, ఇది కేవలం సాంస్కృతిక భేదం వల్లేనని పలువురు అభిప్రాయపడుతున్నారు. నెటిజన్లు కూడా రెండు వర్గాలుగా విడిపోయారు. కొందరు భీమానీకి మద్దతు తెలుపుతూ తమ అనుభవాలను పంచుకోగా, మరికొందరు జపాన్ సంస్కృతిని గౌరవించాలని, అక్కడి పద్ధతులను పాటించాలని సూచించారు.

ఈ ఘటనపై జపాన్ అధికారులు గానీ, సంబంధిత స్టోర్ల యాజమాన్యాలు గానీ ఇంతవరకు అధికారికంగా స్పందించలేదు. విదేశీ పర్యటనల్లో భారతీయ పర్యాటకుల ప్రవర్తనపై ఇటీవల తరచుగా చర్చ జరుగుతున్న నేపథ్యంలో ఈ ఉదంతం మరోసారి ఆ అంశాన్ని తెరపైకి తెచ్చింది.